KULTURË

Tri vajza të reja, të cilat kanë iniciuar një protestë përmes punk-rockut kundër presidentit Vladimir Putin në altarin e katedrales kryesore të Rusisë, kanë dalë në gjykim dje në rastin që konsiderohet si sprovë e tolerancës së presidentit ndaj shprehjes së pakënaqësisë. Gjykimi i aktivisteve - nga bendi “Pussy Riot” - duhet të tregojë se sa është rigjallëruar pushteti i Kishës Ortodokse Ruse dhe udhëheqësit të saj, patriarkut Kirill. Ky i fundit e ka quajtur këtë veprim blasfemie “punk”, që shpërndan fushatë antiklerike. Maria Alvokhina (24), Nadezhda Tolokonnikova (22) dhe Yekaterina Samutsevich (29) ishin burgosur në fund të shkurtit të këtij viti, pasi kishin zënë altarin e Katedrales kryesore në Moskë dhe e kishin shfrytëzuar hapësirën për t’i bërë lutje me këngë Shën Marisë për ta “larguar Putinin jashtë”. Vuajtja e tri grave, njëra prej të cilave ka edhe fëmijë të vegjël, ka bërë bujë të madhe në Perëndim. Qeveri dhe grupe për mbrojtjen e të drejtave, sikurse edhe muzikantë, si Sting dhe bendi “Red Hot Chili Pappers”, kanë shprehur shqetësimin e tyre lidhur me gjykimin, duke reflektuar me dyshime se Putin - i cili është duke shërbyer në mandatin e tij të tretë dhe do të qëndrojë në pushtet deri në vitin 2024 - do të duhej të ishte më tolerant për zërat disidentë.

“Vendimi i gjykatës do të varet jo nga ligji, por nga ajo që dëshiron Kremlini”, ka thënë Lyudmila Alexeyeva, një disidente e periudhës sovjetike dhe aktiviste veterane për të drejtat e njeriut që udhëheq “Moscoë Helsinki Group”. Simbolikisht gjykimi do të mbahet në të njëjtën gjykatë në Moskë, ku ishte burgosur Mikhail Khodorkovsky, i cili u shpall fajtor se ka vjedhur naftë në gjykimin e vitit 2010, të cilin shumica e politikanëve perëndimorë e panë si përpjekje të Kremlinit për ta mbajtur prapa burgut me prapavijë politike. Lidhur me huliganizmin e motivuar nga feja apo armiqësitë, tri gratë, nëse dënohen, mund të dënohen deri më shtatë vjet burgim.
“Pussy Riot”, që  thotë se bendi i tyre është inspiruar nga periudha amerikane feministe e viteve ’90, si “Bikini Kill” dhe “Riot Grrrl”, ka dalë në skenë dimrin e vitit të kaluar me tekste të ashpra dhe me performanca rebele. Bendi, me moshë mesatare prej 25 vjet, e sheh veten si rojë të brezit që po përpiqet të gjejë mënyra kreative për të shprehur pakënaqësinë për dominimin 12-vjeçar të Putinit në skenën politike. Këngëtaret nuk kanë vokaliste, por atyre mund t’u bashkohet kushdo që shpreh dëshirë.
Performanca e palejuar që shkaktoi arrestimin e tri anëtareve të bendit ka ofenduar shumë nga besimtarët ortodoksë e të krishterë rusë, në kishën që ka pasur reputacion të lartë që nga kolapsi i Bashkimit Sovjetik më 1991. Por, derisa dy e treta e shtetit që ka 142 milionë banorë konsiderohen rusë ortodoksë, numri i praktikantëve të kishës është shumë i vogël në vendin ku numri i ateistëve të deklaruar është shumë i madh. Patriarku Kirill ka thënë se kisha është nën “sulme nga persekutuesit” dhe ka inkurajuar prokishtarët që të demonstrojnë në një aktivitet kishtar në prill. Nga ana tjetër, përkrahësit e të akuzuarve thonë se akuzat kanë motive politike.

“Njerëzit janë duke u burgosur për veprimtari të padëmshme civile”, ka thënë Sergei Khramov, një punonjës në gjykatën ku do të mbahet gjykimi. “Kjo e turpëron shtetin tonë”, ka shtuar ai.

(1526 herë i lexuar)     publikuar më 31.07.2012 në 12:16 nga X.J.

KOMENTI

LAJMET E FUNDIT

LAJMET MË TË LEXUARA